Ealaín ar Oileán 2009
Ealaíontóirí ag labhairt le healaíontóirí is bunús leis an gcomhdháil seo ina dtugtar an t-ardán d’ealaíontóirí as na meáin ealaíne éagsúla chun ceisteanna a bhaineann lena n-ealaín a phlé.
Is in Áras Éanna, Inis Oírr, a reachtáiltear an tsraith ríthábhachtach cainteanna is taispeántais phoiblí seo ina ndéantar an ealaín, ní hamháin a cheiliúradh le himeachtaí éagsúla dearc-ealaíne, drámaíochta, agus ceoil, ach a neartú tríd an idirphlé atá riachtanach idir ealaíontóirí agus idir gnéithe éagsúla na healaíne ionas gur féidir léi a meoin sainiúil féin a fhorbairt go neamhspleách.
Orthu siúd a bhí páirteach linn go dtí seo tá na ceoltóirí Aindrias de Staic agus Rónán Ó Snodaigh (thuas), na filí Nuala Ní Dhomhnaill agus Biddy Darach Mac Con Iomaire, na scríbhneoirí Liam Mac Cóil, Seán Mac Mathúna, Eilís Ní Dhuibhne agus Alan Titley.
Ar dheireadh seachtaine 22-24 Bealtaine tionlófar an séú comhdháil d'Ealaín ar Oileán. Orthu siúd a bheidh páirteach i mbliana beidh an cumadóir ceoil Rachel Holstead agus na scríbhneoirí Tomás Mac Síomóin agus Dara Ó Conaola, chomh maith le mathshlua saoithe agus ealaíontóirí!
Cuirfear tús leis an deireadh seachtaine le fáiltiú oíche Dé hAoine, agus bheadh sé i gceist go mbeadh trí sheisiún ann (Dé Sathairn: maidin & tráthnóna; Dé Domhnaigh: maidin). I nGaeilge amháin a reachtáilfear na himeachtaí, agus beidh fáilte roimh chách. Cuirfear deireadh leis an tionól am lóin Dé Domhnaigh chun deis a thabhairt do na cuairteoirí bealach a dhéanamh abhaile.
Comhdháil na bliana 2008
Mórscéal chomhdháil na bliana seo caite ba ea an taispeántas ceoil agus cainte ar thraidisiún an cheoil chlasaicigh a thug an cumadóir ceoil as Lios Póil, Rachel Holstead (sa phictiúr). D'fhag an cur síos spreagúil a rinne sí ar fhorás an cheoil ó thús ama go dtí ceol chumadóirí móra ár linn féin an slua faoi dhraíocht. Mar thoradh air sin tá sé i gceist againn seimineáir ghearra ar ghnéithe ar leith en ealaín a eagrú feasta mar chuid den chomhdháil.
Páirteach léi sa chomhdháil sin ar an téama An Sean agus an Nua bhí an córagrafadóir Ríonach Ní Néill,, na scríbhneoirí Eilís Ní Dhuibhne agus Tomás Mac Síomóin, an t-ealaíontóir Clíodna Cussen, an file Louis de Paor, agus an ceoltóir Eoin Dillon.
Ealaíontóir ar lár
Cúis bhróin d'ealaíontóirí agus do Ghaeil scéala bás Fhlainn Uí Riain, go háirithe dóibh siúd a bhí i láthair ag comhdháil na bliana 2006, ina raibh Flann féin inár gcuideachta lena bhean Annette agus a iníon Aoife. Cartúnaí a raibh guth láidir neamhspleách be ea Flann Ó Riain, nó “doll”, agus ealaíontóir a raibh ardchaighdeán ag roinnt le gach gné dá chuid oibre. Déanaimid comhbhrón lena chomhluadar ar fad.